39. चंद्रशेखर मिश्र जी के 2गो कबिता (गीत) (77, 78) - माईभाखा कबितई प्रतियोगिता
1. चाँद से बात
सुन ए चन्दा बताद ई बतिया की कब अइहें
मोर घरे हो संघतिया की कब अइहें
सुन सुन बदरा में काहे लुकाल
का मोर करेजऊ के सूरत से लजाल
सईया के बा तोहसे भोली रे सुरतिया की कब अइहें
मोर घरे -----।।
अंगना में अइहें त उनका जराइब्
तड़पीला जइसे हम खूब तरसाइब
जब उ मनइहें गरवा डालब हम बहियाँ की कब अइहें
मोरा घरे-------।।
का जाने कवने सवत से अझुरइले
लागेला सईया हमरा के भूल गइले
जियरा में धधकत बा बिरह के अगिया की कब अइहें
मोरा घरे ----------।।
सुन ए बदरा तू सईयाँ भी जइह
रहिया निहारिल जाके बातइह
फूल से सजाइला सेज आधिरतिया की कब अइहें
मोरा घरे ---------------।।
सुन ए चन्दा --------------------।।
2. आपन गाँव
फुटेला किरिनियाँ जब,चहकेले चिरइयाँ हो
इयाद पड़ेला ए भईया, हमरो आपन गईयाँ हो।।
मस्त हवा के झोका जब, आपन राग सुनावेला
कन -कन में संगीत बसल बा, ई सब के उ बतवेला
सनन- सनन जब चले पुरवईया,
डग-मग डोले नइया हो ।
ईयाद पड़ेला ए भइया-----------------।
फुटेला---------------------------------------।।
चइता फगुआ आउर दिवाली, अजबे लागेला सुहावन
रोपनी के गीतवा से गहगह करे बधरिया मनभावन
झूम झुम के गावे जब करे किसान कदइया हो ।
इयाद पड़ेला------------------------------------------।
फुटेला किरिनियाँ-----------------------------------।।
चहक -चहक के फुदक फुदक के, चिरई चह -चह जब करेले
लचक -लचक के मटक-मटक के, भरे पानी गोरिया चलेले
महलो से अच्छा लागेला, चुनमुन मोर
मड़ईया हो
इयाद पड़ेला-----------------------------------।
फुटेला------------------------------------------।।
चंद्रशेखर मिश्र
अनुआँ, आरा
8789957277
टिप्पणियाँ
एक टिप्पणी भेजें